• Sun. Jul 21st, 2024

चार वर्षदेखि आत्मकथा लेख्दै करिश्मा

Bysaptahiksamachar

२५ माघ २०७७, आईतवार २३:५९ २५ माघ २०७७, आईतवार २३:५९ २५ माघ २०७७, आईतवार २३:५९

अभिनेत्री करिश्मा मानन्धर नेपाली फिल्म क्षेत्रमा प्रवेश गर्दा नेपालमा फिल्म निर्माणले भर्खर-भर्खर गति लिन थालेको थियो । १४ वर्षको कलिलो उमेरमा फिल्म ‘सन्तान’ बाट अभिनय करिअर सुरु गरेकी उनले फिल्म क्षेत्रमा तीन दशक विताइसकेकी छन् । केही भारतीय फिल्ममा समेत काम गरिसकेकी करिश्मा आफ्नो समयकी सबैभन्दा सफल अभिनेत्रीको रुपमा चिनिन्छिन् ।   करिअरको उत्कर्षमा रहँदा ‘कस्तुरी, ट्रक ड्राइभर, भाउजु, एक नम्बरको पाखे, जिन्दगी, बसन्ती, ढुकढुकी’ जस्ता एकसेएक सुपरहिट फिल्म दिएकी उनले फिल्म निर्माणमा समेत हात हालेकी छन् । ‘ढुकढुकी’ बाट राम्रो मुनाफा कमाएकी उनलाई ‘बाबुसाहेब’ ले भने नराम्रोसँग डुबायो । यसपछि निराश भएर २०६१ सालमा अमेरिका गएकी उनी करीब ९ वर्ष त्यहीँ बसिन् । 

अमेरिकामा रहँदा उनी ‘नेम र फ्रेम’ बाट टाढा थिइन् । जसका कारण उनी खुसी हुन सकेकी थिइनन् । तर, अमेरिका छाडेर उनी नेपाल फर्किन पनि सकेकी थिइनन् । एपी वान टेलिभिजनले सुरु गरेको ‘किताव जात्रा’ को ‘पर्दा भित्र र पर्दा बाहिर’ सेसनमा अभिनेत्री मानन्धरले लेखक कर्ण शाक्यको किताबमा उल्लेख भएका तीन वटा शब्दले आफूलाई नेपाल फर्काएको बताएकी छन् ।   ‘मेरो जीवनमा प्रभाव परेको किताब कर्ण शाक्यको हो, जसबाट प्रभावित भएर मैले जीवनमा नै लागू गरेँ । त्यो किताब विनोद जी (मानन्धर) ले गिफ्ट गर्नुभएको थियो । त्यसबेला म अमेरिकामा बसिरहेको थिएँ । म त्यहाँ बस्न चाहन्न थिएँ । तर, नेपाल फर्किन पनि सकेको थिइनँ । अमेरिकामा नै बस्ने वा नेपाल फर्किने भन्ने निर्णय लिन मलाई अत्यन्त कठिन भएको थियो,’ उनले भनिन् ।   करिश्मा अगाडि भन्छिन्, ‘त्यो अवस्थामा कर्ण शाक्यको किताबमा भनिएको तीनवटा कुराले मेरो जीवनमा एउटा निर्णय लिने शक्ति प्रदान गर्‍यो । किताबमा भनिएको थियो, जब मान्छे देश छाडेर विदेश जान्छ तब ऊ रुटलेस, नेमलेस र फेशलेस हुन्छ । त्यो ठाउँमा तिमी आफूलाई कसरी टिकाउन सक्छौं भन्ने कुराले मलाई असाध्धै छायो । म बस्ने धर्ती त मुलुकै हो भनेर नेपाल फर्किएँ ।’   उनले चारवर्षदेखि आफ्नो आत्मकथा आफैं लेखिरहेको पनि बताएकी छन् । उक्त कार्यक्रममा सहभागी अभिनेता राजेश हमालले करिश्मा मानन्धरको आत्मकथा आए धेरैका लागि प्रेरणा हुनसक्ने बताए । उनले करिश्मालाई जीवनप्रतिको उद्येश्य, जीवन भोगाइ र चुनौतीहरु आत्मकथामा समेट्न सुझाव दिए । करिश्माले यी सबै कुरा आफ्नो आत्मकथामा उतार्ने प्रयासमा रहेको बताइन् ।

2 thoughts on “चार वर्षदेखि आत्मकथा लेख्दै करिश्मा”

Leave a Reply

Your email address will not be published. Required fields are marked *