भद्रपुर ८,असोज / समाजसेवी दिनबन्धु गोयललाई झापाको भद्रपुर ६ स्थित श्रीकृष्ण द्वैपायन गुरुकुल बेद विद्याश्रमले शनिबार सम्मान तथा अभिनन्दन गरेको छ ।
गुरुकुलका मुख्य अक्षयकोष दाता र भवन निर्माणका सहयोगी एवं मन्दिर निर्माणकर्ता पनि रहेका संरक्षक गोयललाई विशेष समारोहको आयोजना गरी अभिनन्दन गरिएको हो ।
श्रीकृष्ण द्वैपायन गुरुकुल वेद विद्याश्रमकै सभाकक्षमा भद्रपुर नगर उपप्रमुख राधा कार्कीको प्रमुख आतिथ्यमा भएको कार्यक्रममा शिक्षासेवी पनि रहनु भएका गोयलले गुरुकुलका ७५ विद्यार्थी र १३ शिक्षक कर्मचारीलाई जनही ५ सय रुपैयाँसहित एक/एक सेट बस्त्र उपहार दिनु भएको थियो ।
उद्योगी गोयलले आफ्नो ७५ औं जन्मोत्सव र विवाहको ५० औं बर्षगाँठ तथा माइला दाजु ओमप्रकाश गोयलको पुण्यस्मृतिको अवसर पारेर १ सय १ महिला र ३५ जना पुरुषलाई जनही ५ सय नगदसहित एक/एक सेट बस्त्र उपहार दिनुका साथै सोही अवसरमा उहाँले भद्रपुर नगरपालिका भित्रका सामुदायिक विद्यालयमा अध्ययनरत २६ जना विपन्न छात्रछात्रालाई जनही १० हजार रुपैयाँको दरले छात्रबृत्ति पनि प्रदान गर्नुभयो ।
गुरुकुलका अध्यक्ष रेमनाथ चुडालको अध्यक्षतामा भएको कार्यक्रममा गुरुकुलका पूर्व अध्यक्ष राजेन्द्र चापागाईंले शुभकामना दिनुभयो भने समाजसेवी गोयलले आगामी दिनमा पनि यसैगरी सहयोग प्रदान गर्न आजको कार्यक्रमबाट थप प्रेरणा मिलेको बताउनुभयो ।
प्राचार्य महेन्द्र भट्टराईको संचालन र महासचिव प्रेमप्रसाद अधिकारीले स्वागत गरेको कार्यक्रममा शिक्षासेवी जयन्ती मानी, गुरुकुलका कोषाध्यक्ष महतलाल राजवंशी र गुरुकुलका विद्यार्थी शिक्षकले सहजीकरण गरेका थिए । उद्योगी गोयलले गुरुकुलको अक्षयकोषमा आफ्ना परिवारका ३४ जनाको तर्फबाट ५४ लाख भन्दा बढीको योगदान दिनुभएको छ भने भवन निर्माणको लागि ६ लाख प्रदान गर्नुका साथै वेदविद्याश्रम परिसरमा एउटा मन्दिर पनि बनाइदिनुभएको छ ।
