भद्रपुर २५,भदौ /नेपाल रेडक्रस सोसाइटी भद्रपुर उपशाखाले पोषण पुनर्स्थापना गृहलाई तयारी पोसाक र मास्क प्रदान गरेको छ। यो सँगै नेपाल रेडक्रस सोसाइटीको ५९ औं स्थापना दिवसको सन्दर्भमा रेडक्रस भद्रपुर उपशाखाले शुरू गरेको साताव्यापी कार्यक्रम पनि आजबाट अन्त्य भएको छ। रेडक्रस भद्रपुरले पोषण गृहमा आउने कुपोषित बच्चा र तिनका आमाहरूका लागि तयारी पोसाक तथा मास्क र फलफूल प्रदान गरेको हो।
रेडक्रस भद्रपुरका सभापति गोपाल गिरीको सभापतित्व र मेची प्रादेशिक अस्पतालका मेडिकल सुपरिटेन्डेन्ट डाक्टर टंकप्रसाद बारकोटीको प्रमुख आतिथ्यमा भएको कार्यक्रममा रेडक्रसले ती सामग्री हस्तान्तरण गरेको हो।
भद्रपुर रेडक्रसले चलाएको मास्क वैंकमा ‘हुनेले दिएर जाऔं-नहुनेले लिएर प्रयोग गरौं’ भन्ने नारा र आफ्नो जन्म दिन रक्तदान गरेर मनाउन आह्वान गरे अनुरूप भद्रपुर – ८ का रमेश न्यौपानेले आजै रक्तदान गर्नुका साथै भद्रपुर रेडक्रसलाई एक प्याकेट मास्क प्रदान गर्नुभएको भद्रपुर रेडक्रसका सचिव दीप लिम्बूले जानकारी दिनुभयो। साताव्यापी कार्यक्रमका संयोजक समेत रहनु भएका लिम्बूका अनुसार सातै दिन रक्तदान, मास्क वितरण, तयारी पोसाक वितरण र मन्दिर परिसर निष्क्रमण लगायतका कामहरू गरिएको छ।
