स्थापना दिवसमा भद्रपुर रेडक्रसद्वारा लेखक गिरीलाई सम्मान

भद्रपुर १९, भदौ / नेपाल रेडक्रस सोसाइटीको ६३ औँ स्थापना दिवसको अवसरमा भद्रपुर उपशाखाले रेडक्रसकर्मीहरू बीच पुनर्मिलन, शुभकामना आदानप्रदान तथा नयाँ सदस्यहरूलाई प्रमाणपत्र वितरण गर्दै सम्मान कार्यक्रम सम्पन्न गरेको छ।
  २०२० साल भदौ १९ गते नेपालमा रेडक्रसको स्थापना भएको हो। सोही स्थापनाको सम्झनामा आज भद्रपुर रेडक्रसले रेडकसका जन्मदाता ज्या हेनेरी डयुना र नेपाल रेडक्रसका संस्थापक सभापति प्रिन्सेप शाहको तस्वीरमा माल्यार्पण गरेको थियो।
   भद्रपुर नगरपालिकाका नगरप्रमुख गणेश पोखरेलको प्रमुख आतिथ्य र रेडकस भद्रपुर उपशाखाका सभापति केदार महतको अध्यक्षतामा भएको स्थापना दिवसको कार्यक्रममा ७० जना बढी आजीवन सदस्यहरुलाई प्रमाणपत्र वितरण गर्दै सम्मान गरिएको थियो।

सोही कार्यक्रममा सदस्यता ग्रहण गर्नुहुने भद्रपुर ९ का राजकुमार राईलाई विशिष्ट सदस्यताको प्रमाणपत्र सहित सम्मान गरिएको थियो भने नेपाल रेडक्रस सोसाइटी भद्रपुर उपशाखाका निवर्तमान सभापति गोपाल गिरीलाई भद्रपुर रेडक्रसको उत्थानका लागि पुर्‍याएको योगदान र उहाँले हालै प्रकाशन गरेको पुस्तक ” सदरमुकाम भद्रपुरको गाथा” का लागि समेत सम्मान गरिएको थियो। सो कार्यक्रममा नेपाल रेडक्रस सोसाइटी भद्रपुर उपशाखाले गिरीद्वारा लिखित पुस्तक १० थान खरिद पनि गरेको थियो।
कार्यक्रममा प्रमुख अतिथि नगर प्रमुख पोखरेल, नेपाल रेडक्रस सोसाइटीका पूर्व कोषाध्यक्ष भक्त खवास, भद्रपुर ८ नम्बर वडाका वडाध्यक्ष गौरव सुब्बा मनोज, नेपाल रेडक्रस सोसाइटीका झापा कोषाध्यक्ष ओमप्रकाश गौतम, सम्मानित व्यक्तित्व तथा भद्रपुर रेडक्रसका निवर्तमान अध्यक्ष गोपाल गिरी, सामाजिक व्यक्तित्व छत्रप्रसाद अधिकारी र गोविन्द कोइरालाले शुभकामना मन्तव्य राख्नुभएको थियो।

भद्रपुर रेडकसका सचिव रमेश भण्डारीले सञ्चालन गरेको कार्यक्रममा सदस्य रमला बराल अधिकारीले स्वागत मन्तव्य राख्नुभएको थियो।