निजामती कर्मचारी संगठनको स्वास्थ्य शिविर सम्पन्न, ६८३जना लाभान्वित

भद्रपुर १९, चैत / नेपाल निजामती कर्मचारी संगठन झापाले भद्रपुरमा  आयोजना गरेको निःशुल्क स्वास्थ्य शिविर सम्पन्न भएको छ ।
झापाका सर्वसाधारण नागरिकलाई निःशुल्क उपचार सेवा प्रदान गर्ने उद्देश्यले संगठनले सामाजिक उत्तरदायित्व अन्तर्गत नोवेल टिचिङ हस्पिटल विराटनगरको प्राविधिक सहयोगमा भद्रपुर–१० स्थित वीरेन्द्र नमूना क्याम्पस परिसरमा मंगलवार शिविर आयोजना गरेको हो।
  संगठनका अध्यक्ष हिरण्य न्यौपानेको अध्यक्षतामा सम्पन्न संक्षिप्त समारोहका बीच प्रमुख अतिथि भद्रपुर नगरपालिकाका प्रमुख गणेश पोखरेलले आफ्नै मुटुको जाँच गर्दै शिविरको उद्घाटन गर्नुभएको थियो ।
शिविर उद्घाटनका अवसरमा प्रमुख अतिथि पोखरेल,नगर उपप्रमुख राधा कार्की,संगठनका केन्द्रीय उपाध्यक्ष युवाचन्द्र घिमिरे, डा.राजेश नेपाल लगायतले मन्तव्य राख्नुभएको थियो। संगठनका उपाध्यक्ष चिरन खतिवडाले स्वागत मन्तव्य राखेको शिविर उद्घाटन समारोहको सञ्चालन सचिव पूर्णचन्द्र मैनालीले गर्नुभएको थियो। 

शिविरमा मुटुरोग, जनरल मेडिसिन, स्त्रीरोग, बालरोग, हाडजोर्नी तथा नसा, नाक कान घाँटी, दन्त रोग, आँखा परीक्षण,शल्यक्रिया चिकित्सा सेवा, रेडियोलोजी, ल्याव परीक्षण सेवा प्रदान गरिएको थियो। परीक्षण पछि निःशुल्क औषधि समेत उपलब्ध गराइएको शिविरबाट ६ सय ८३ सर्वसाधारणले लाभ लिएको संगठनका अध्यक्ष न्यौपानेले जानकारी दिनुभयो ।