यूराशिया रेयूकाई २८औं शाखाको १७ औं स्थापना दिवस एवं भब्य भेला सम्पन्न

भद्रपुर २६ फागुन / यूराशिया रेयूकाई २८ औं शाखाको १७ औं स्थापना दिवस एवं भब्य भेला आज भद्रपुरमा सम्पन्न भएको छ। जापानबाट सामाजिक संजाल जुममा सहभागी हुनुभएको यूराशिया रेयूकाईकी संरक्षक एवं प्रमुख मार्गनिर्देशक मुमा श्रीमती हिरोको मासुनागाको मार्गनिर्देशनमा कार्यक्रम सम्पन्न भएको मिहाता जिम्मेवार शिबुचो लालकुमार श्रेष्ठले बताउनुभयो।

भद्रपुर नगर पालिकाका प्रमुख गणेश पोखरेलको प्रमुख आतिथ्यमा भएको भव्य भेलामा १७ जनालाई जापान रेयूकाई हेड्क्वाटरबाट प्राप्त २० बर्ष शिबुचो उपाधिमा अभ्यास गरेको ‌प्रमाण पत्र र उपहार, २ जनालाई समाज बिकासमा योगदान पुर्याए बापत प्रशंसा पत्र, १ जनालाई आफुले प्राप्त गरेको शिक्षा सही कार्यान्वयन गरे बापत प्रशंसा पत्र तथा १५ जना उत्साही महिलाहरुलाई समाज बिकासमा बिशेष योगदान पुर्याए बापत कृतज्ञता पत्र प्रदान गरिएको थियो ।

नगरप्रमुख पोखरेल, उपप्रमुख राधा कार्की र ८ नम्वर वडा अध्यक्ष गौरव सुब्बा (मनोज) ले यूराशिया रेयूकाई २८औं शाखाको भवन भद्रपुरमा हुनु गौरबको कुरा भएकोले यसको संरक्षण, सम्बर्धनमा सहकार्य गर्ने प्रतिबद्धता जाहेर गरेको उक्त कार्यक्रममा मिहाता जिम्मेवार शिबुचो श्रेष्ठले भवन बन्नुको कारण, लक्ष, उद्देश्य र रेयूकाई शिक्षाको बारेमा प्रकाश पार्नु भएको थियो भने श्रीमती लिना श्रेष्ठले योंग मिसेश र बच्चा हुर्काइ सम्बन्धमा तथा पुजा श्रेष्ठले युवाहरुमा अपील, जीवन श्रेष्ठले रेयूकाई शिक्षा कार्यान्वयनबाट पाएको अनुभव र अमृतप्रसाद श्रेष्ठले जापान भ्रमणको प्रभाव सहितको अनुभव शेयर गर्नु भएको थियो ।

दिब्यज्योति शिबुचो मुक्तिनाथ दाहालले स्वागत र निमित्त हेमकुमार श्रेष्ठले धन्यबाद दिनु भएको भेलामा नेपालको झापा, इलाम, सुनसरी, मोरङ र भारतका सहित ८५ जनाको प्रत्यक्ष उपस्थिति थियो भने सामाजिक संजाल जूममार्फत जापान लगायत नेपालको धरान, बिराटनगर, नारायणगढ, धुलिखेल, काठमाण्डौसमेतबाट धेरै जना सहभागी हुनुहुन्थ्यो।