भद्रपुर मारवाडी संघको अध्यक्षमा अजय पुनः सर्वसम्मत चयन

भद्रपुर २०,फागुन / झापाको सदरमुकाम भद्रपुरमा रहेको भद्रपुर मारवाडी संघको अध्यक्षमा अजय साहेवाला सर्वसम्मत चयन हुनुभएको छ। साहेवाला दोस्रो कार्यकालका लागि अध्यक्षमा चयन हुनुभएको हो ।
भद्रपुर ६ स्थित संघको कार्यालय परिसरमा यस वर्षको होली पर्वको सन्दर्भमा शनिबार साँझ आयोजना गरिएको होली मिलन समारोहको अवसर पारेर संघको नयाँ कार्यसमिति चयन गरिएको हो ।
मोरङको रङ्गेली नगरपालिकाका प्रमुख दिलीपकुमार अग्रवालको प्रमुख आतिथ्यमा आयोजित समारोहले सर्वसम्मत चयन गरेको कार्यसमितिको उपाध्यक्षमा विनय गोयल, सचिवमा मुकेश मित्रुका, सहसचिवमा गोपाल साहेवाला र कोषाध्यक्षमा दिलीप वंशल हुनुहुन्छ भने पुष्कर अग्रवाल, भाष्कर शर्मा, निर्मलकुमार अग्रवाल, दिवाकर शर्मा, सन्दीप अग्रवाल, जितेन्द्र शर्मा, अविनाश नाहाटा, महावीर मित्रुका र मोहित शर्मा सदस्य हुनुहुन्छ । यस्तै महेश मित्तल निवर्तमान अध्यक्षको रुपमा कार्यसमितिमा रहने नवनिर्वाचित अध्यक्ष साहेवालाले जानकारी दिनुभयो ।
भद्रपुर मारवाडी संघ, भद्रपुर मारवाडी युवा सञ्च, भद्रपुर मारवाडी महिला मञ्च तथा भद्रपुर मारवाडी युवती मञ्चले संयुक्तरुपमा आयोजना गरेको समारोहका बीच होलीसँग सम्बन्धित विविध सांगीतिक तथा मनोरञ्जनात्मक प्रस्तुतिहरु रहेका थिए भने मारवाडी समुदायबाट शिक्षा क्षेत्रमा उत्कृष्टता हासिल गर्ने विद्यार्थीहरुलाई पुरस्कुत गरिएको थियो ।
उनीहरुलाई समारोहका प्रमुख अतिथि अग्रवाल, विशिष्ट अतिथि संघका पूर्व अध्यक्ष सत्यनारायण तायललगायतले पुरस्कार वितरण गरेका थिए ।
भाष्कर शर्मा र निलम गोयलले संयुक्त रुपमा सञ्चालन गरेको समारोहमा उल्लेख्य सहभागिता रहेको भद्रपुर मारवाडी मञ्चका पंकज शर्माले जानकारी दिनुभयो ।