भद्रपुर, २५ माघ / झापा, भद्रपुर – ५ मा रहेको पशुपति प्राथमिक विद्यालयको ६० औं बार्षिकोत्सव तथा अभिभावक दिवस आज विभिन्न कार्यक्रम गरी मनाइएको छ। विद्यालय व्यवस्थापन समितिका अध्यक्ष डम्बर बर्माको अध्यक्षता र भद्रपुर नगरपालिकाका प्रमुख गणेश पोखरेलको प्रमुख आतिथ्यमा कार्यक्रम भएको हो।
सो अवसरमा समाजसेवी दीनबन्धु गोयलद्वारा आफ्ना दाजु स्व.ओमप्रकाश गोयलको स्मृतिमा स्थापित अक्षय कोषबाट बाल कक्षादेखि पाँच कक्षासम्मका छात्र छात्रालाई पुरस्कार प्रदान गरिनुका साथै शिक्षक सुनम कार्कीलाई उत्कृष्ट शिक्षकका रूपमा सम्मान गरिएको थियो।
सोही कार्यक्रममा चन्द्रमाया श्रेष्ठद्वारा सासु रत्नमाया श्रेष्ठको स्मृतिमा स्थापित अक्षय कोषबाट पनि छात्र छात्रालाई पुरस्कृत गरिएको थियो। कार्यक्रममा नगर प्रमुख पोखरेल, उपप्रमुख राधा कार्की, वडा अध्यक्ष बन्धु कार्की, नगर शिक्षा प्रमुख राजकुमार ओडारी, सामुदायिक प्रहरी सेवा केन्द्र भद्रपुरकी अध्यक्ष शिला खड्का, भानु प्राथमिक बिद्यालयका प्रधान अध्यापक सीता विमली र शिक्षक ललिता क्षेत्रीले मन्तव्य राख्नुभएको थियो।
सहयोगी धर्म राईका अनुसार, विद्यालयका प्रधानाध्यापक लक्ष्मीप्रसाद ढकालले वार्षिक प्रतिवेदन प्रस्तुत गर्नुभएको कार्यक्रमको सञ्चालन शिक्षक अनिता रिजालले गर्नुभएको थियो भने छात्रा अन्जनी मल्लिकले स्वागत मन्तव्य व्यक्त गर्नुभएको थियो।