ज्ञानोदय साकोसको १४ औं साधारण सभा सम्पन्न

१९ लाख बढी नाफा आर्जन

भद्रपुर, ६ असोज / झापाको भद्रपुर-८ मा सञ्चालित ज्ञानोदय शिक्षक बचत तथा ऋण सहकारी संस्था लिमिटेडले १४ औं बार्षिक साधारण सभा सम्पन्न गरेको छ। जिल्ला बचत तथा ऋण सहकारी संस्था झापाका अध्यक्ष गणेश ढकालको प्रमुख आतिथ्य र सहकारीका अध्यक्ष गोपीकृष्ण नेउपानेको अध्यक्षतामा शनिबार चन्द्रगढीस्थित वीरेन्द्र माध्यमिक विद्यालयको सभा हलमा साधारण सभा सम्पन्न भएको हो।
विद्याबारिधि हाँसिल गर्ने सफल सन्ततिका अभिभावक धरणी – घनेन्द्र शर्मा तथा भीमबहादुर श्रेष्ठलाई शिक्षा सहकारी सन्तति सम्मान प्रदान गरिएको साधारण सभामा संस्थापक अध्यक्ष एवं वरिष्ठ सल्लाहकार भलकाजी कठेत र प्रथम श्रेणीमा बढुवा हुनुभएका शिक्षकद्वय भीम दाहाल र जयकुमार प्रसाईंलाई समेत सम्मान गरिएको थियो।

सेवा निवृत्त शिक्षकहरू क्रमशः मिश्रादेवी गुरुङ, सोमबहादुर तामाङ, किशन न्यौपाने, नवकुमार राय, कृष्णप्रसाद सुवेदी,देवीप्रसाद पराजुली र सावित्री न्यौपाने सुवेदी तथा उत्कृष्ट बचतकर्ता शुष्मा दाहाल र उत्कृष्ट ऋणी जानुका तोलाङ्गीलाई समेत सम्मान गरिएको सो साधारण सभाका प्रमुख अतिथि ढकाल, भद्रपुर नगरपालिकाका उपप्रमुख राधा कार्की, सहकारी बचत संघका लेखा सदस्य राजेन्द्रप्रसाद रिजाल र भद्रपुर नगरपालिकाका सहकारी विभाग प्रमुख नेत्रप्रसाद पोखरेलले शुभकामना मन्तव्य राख्नुभएको थियो।

साधारण सभामा संस्थाका अध्यक्ष न्यौपानेले बार्षिक प्रतिवेदन र लेखा समिति संयोजक खड्गनारायण श्रेष्ठले आर्थिक प्रतिवेदन प्रस्तुत गर्दै ४११जना सदस्य रहेको सहकारीले आर्थिक वर्ष २०७९ /०८० मा १९ लाख बढी खुद नाफा आर्जन गरेको जनाइएको छ। सहकारीका उपाध्यक्ष धनकुमारी खरेल’लता’ ले स्वागत मन्तव्य र सचिव डिल्लीराम अधिकारीले संचालन गरेको साधारण सभामा सृजन सापकोटा र प्रशिध्दी निरौलालाई शिक्षा सन्तति पुरस्कार प्रदान गरिएको थियो।