भद्रपुर १६ मङ्सिर / ग्यालेक्सी कप फुटबल नकआउट प्रतियोगिता अन्तर्गत शुक्रबार भएको खेलमा इष्ट होराइजन, इष्ट पोइन्ट, ग्रीन फिल्ड, हिमालय इङ्ग्लिस स्कुल र ज्ञान सरोवर मावि विजयी भएका छन्।
झापा भद्रपुर-९ मा रहेको ग्यालेक्सी इङ्ग्लिस स्कुलको आयोजनामा सञ्चालित ग्यालेक्सी कप फुटबल नकआउट प्रतियोगिताको शुक्रबार ५ वटा खेल भएको विद्यालयका शिक्षक विवेक चम्लागाईंले जानकारी दिनुभयो।
उहाँका अनुसार शुक्रबारको पहिलो खेलमा मुनाल एकाडेमीको ४ गोलका विरूध्द ५ गोल गर्दै इष्ट होराइजन विजयी भएको हो। विजेताको निर्णय सडन डेथबाट गरिएको हो। यो खेलमा इष्ट होराइजनका प्रिन्स चेम्जोङ मेन अफ दि म्याच घोषित भएका थिए।
त्यसैगरी दोस्रो खेलमा ब्राइट स्टारलाई शुन्यमै रोक्दै इष्ट पोइन्टले अगाडिको यात्रा तय गरेको छ। यस खेलमा विजेता टीमका क्रिस राजवंशी मेन अफ दि म्याच घोषित भए।
त्यस्तै, तेस्रो खेलमा प्रणय लिम्बू मेन अफ द म्याच घोषित हुँदा उनी सम्मिलित ग्रीन फिल्ड स्कूलले प्रज्ञा एकाडेमीलाई शुन्यमा रोक्दै २ गोल गरेको थियो।
ग्यालेक्सी स्कूलको खेल मैदानमा भएको चौथो खेलमा सेन्ट कुजुरको २ गोल विरूध्द ३ गोल गर्दै इष्ट होराइजन धुलावारी विजयी भयो।यो म्याचमा विजेता विद्यालयका क्षितिज बुढाथोकी मेन अफ दि म्याच घोषित भए भने शुक्रबारनै भएको पाँचौ तथा अन्तिम खेलमा हिमालयन इङ्ग्लिस स्कुल भद्रपुरलाई पराजित गर्दै ज्ञान सरोवर भद्रपुर विजयी भएको छ। हिमालयनलाई गोल गर्नबाट रोक्दै सरोवरले ३ गोल गर्दा म्यान अफ द म्याच विजेता विद्यालयका सौरव राई घोषित भएका थिए।
भद्रपुर नगरपालिकाका प्रमुख गणेश पोखरेलको प्रमुख आतिथ्य र उपप्रमुख राधा कार्कीको विशिष्ट आतिथ्यमा हिजोबाट जारी तेस्रो संस्करणको ग्यालेक्सी कप नकआउट फुटबल प्रतियोगिता १८ गतेसम्म सञ्चालन हुने आयोजक विद्यालयका प्रिन्सिपल टंकनाथ शर्मा पाण्डेले जानकारी दिनुभयो। प्रतियोगितामा चौधवटा संस्थागत विद्यालयको सहभागिता रहेको छ।
