सदरमुकाम भद्रपुरमा सामाजिक अभियन्ता पुनको पुस्तक बिक्री अभियान सुरु

भद्रपुर २३, साउन / सामाजिक अभियन्ता डा. महावीर पुन आत्मकथा (किताब) ‘महावीर पुन : सम्झना, सपना र अविरल यात्रा’ विक्री अभियानको क्रममा शुक्रवार भद्रपुर आइ पुग्नु भएको  छ ।
विर्तामोडमा १९ दिन किताब बेचेर उहाँ आज भद्रपुर आउनु भएको हो । 
किताब विक्रीबाट आएको रकम उहाँले आविष्कार केन्द्र र वीरगञ्ज कृषि औजार कारखानामा खर्च गर्दै आउनु भएको छ ।
भद्रपुरको एयरपोर्ट होटलबाट उहाँले भद्रपुरको किताब यात्रा सुरु गर्नु भएको छ । दिउँसो उहाँलाई भद्रपुर नगरपालिकाले भब्य स्वागत र सम्मान गरेको थियो ।
आजै उहाँ भद्रपुरको आठ स्थानमा किताब विक्री अभियानको क्रममा पुग्नुभएको भद्रपुरको अभियानमा सम्बद्ध प्रतिष्ठित व्यवसायी दिपेश ढकालले बताउनुभयो

भद्रपुर पुग्दै गर्दा वैज्ञानिक पुनले भद्रपुर नगरपालिकाको प्रशंसा गर्नु भएको छ । उहाँले फेसबुकमा लेख्नु भएको छ– ‘भद्रपुर नगरपालिका झापाको सूचना उर्दी हेर्नुहोस् । कोही पालिका प्रमुख यस्ता सहयोगी छन् । कोही कोही पालिका प्रमुखहरु जिउँदै स्वर्गमा पु-याई दिउँ जस्ता हाँडी घोप्टे पनि देखियो ।’
भद्रपुर नगरपालिकाका नगरप्रमुख गणेश पोखरेलद्वारा हस्ताक्षरित सूचनाको उहाँले प्रशंसा गर्नु भएको हो । सूचनामा नगरपालिकाद्वारा पुनको सम्मान र पुस्तक विक्रीका लागि आज आयोजित कार्यक्रममा उपस्थित भइदिन जनप्रतिनिधि, कर्मचारी, संघसंस्था र बुद्धिजीवीलाई आग्रह गरिएको थियो ।
उहाँको भद्रपुरमा आयोजित विक्रीको पहिलो कार्यक्रम एयरपोर्ट होटल भद्रपुरमा भब्य रुपमा सम्पन्न भएको थियो । त्यस कार्यक्रममा झापा उद्योग संघका अध्यक्ष यमबहादुर श्रेष्ठले आफ्नो संस्थाउद्योग संघ र आफ्नो समेत लगानीमा रहेका उद्योग प्रतिष्ठानबाट २ सय पुस्तक खरीद गर्ने स्व घोषणा गर्नुभएको थियो । कार्यक्रममा गणेश पोखरेल, उपप्रमुख राधा कार्की, वडाध्यक्ष मनोज सुब्बा लगायत वडाअध्यक्षहरु प्रतिष्ठित व्यवसायी दिपेश ढकाल, व्यवसायी टिकाराज ढकाल, पूर्व नगरप्रमुख जीवन कुमार श्रेष्ठ सहितको व्यापक उपस्थिति थियो ।

त्यस्तै, आजै भद्रपुर नगरपालिकामा भएको कार्यक्रममा भद्रपुर नगरपालिकाले ५० हजार बराबरको पुस्तक खरिद गर्ने घोषणा गरेको थियो।नगर प्रमुख गणेश पोख्रेलको अध्यक्षतामा भएको कार्यक्रममा कार्यक्रमका प्रमुख अतिथि पुनले आफ्नो पुस्तक लेखन र यायावर झै देशैभर गरिएको यात्राको औचित्य र उद्देश्यमाथि प्रकाश पार्नुभएको थियो। सो कार्यक्रममा प्रदेश सभा सदस्य मोहन महर्जन, भद्रपुर नगरपालिकाकी उपप्रमुख राधा कार्की लगायतले पनि पुस्तक खरिद गरेर देश सेवामा सहयोग पुऱ्याउन आग्रह गरेका थिए । पुनले हालसम्म देशका ४३ जिल्लाको भ्रमण गरिसक्नु भएको छ । उहाँका अनुसार अहिलेसम्म २ लाख २५ हजार पुस्तक बिक्रीबाट खर्च कटाएर संकलित१२ करोड बढी रुपैयाँ कृषि औजार कारखानामा लगानी भइसकेको छ।