भद्रपुर २१,असार / भारतमा बस्ने नेपालीहरूले आफ्नै बैंक स्थापनाको तयारी गरेका छन् । सन् २०१९ बाट भारतको राजधानी दिल्लीमा सञ्चालनमा रहेको पशुपतिनाथ बचत तथा ऋण सहकारी संस्थालाई स्तरोन्नति गर्दै बैंक सञ्चालनको तयारी भइरहेको सो सहकारीका अध्यक्ष मोहन कार्कीले ग्लोबल गोर्खा टाइम्सलाई बताउनु भएको छ।
ग्लोबल गोर्खा टाइम्ससँगको वार्तालापमा कार्कीले बैंक स्थापना र स्वीकृतिका लागि रिजर्भ बैंक अफ इण्डियाबाट स्वीकृति पाउन अन्तिम चरणको काम मात्र बाँकी रहेको जनाउनु भएको छ।
ग्लोबल गोर्खा टाइम्समा प्रसारित समाचारमा रोजगारी र अन्य विभिन्न पेशा व्यवसाय गरी भारतमा स्थापित भएका नेपाली समुदायलाई लक्षित गरी नेपालीहरूकै लगानी र सेवा सुविधाका लागि सहकारी स्थापना गरिएकोमा त्यसैलाई स्तर बृद्धि गरेर बैंकको अवधारणा विकास भएको कार्कीको कथन छ । समाचार अनुसार सो सहकारीको ७ करोड भन्दा बढीको पूँजी कोष र ३ हजारभन्दा बढी सदस्य छन् ।
भारतको राजधानी दिल्लीमा आफ्नै भवनमा सञ्चालनमा रहेको सहकारीसँगै भारतमा बस्ने नेपाली समुदायले दिल्लीमा नेपाली पुस्तकालय सञ्चालनमा ल्याएका छन् । अव उनीहरू विजिनेस सेन्टरको विकास गरी सामुदायिक हल, गेस्टहाउस, नेपालीपनको भोजनालय, नेपाली ड्रेस आदि एकै ठाउँमा उपलब्ध हुने गरी व्यवसायिक भवन समेत बनाउने तयारीमा जुटेका छन्।