भद्रपुर १६, वैशाख / शिक्षा ऐन जारी गर्नु पर्ने माग सहित राजधानी काठमाडौं केन्द्रित प्रदर्शन जारी राखेका शिक्षकहरूले स्थानीय तहमा पनि धर्ना दिन थालेका छन् । शिक्षक महासंघको आह्वानमा शिक्षकहरुले हिजो आइतवारदेखि स्थानीय तहमा पनि धर्ना दिन थालेका हुन् ।
यस क्रममा, भद्रपुर नगरपालिकामा पनि हिजोबाट शुरु भएको शिक्षकहरूको धर्ना आज पनि जारी रहेको छ । २८ दिनदेखि काठमाडौं केन्द्रित प्रदर्शन जारी राखेका शिक्षकहरूले सरकारलाई दबाब दिन स्थानीय तहमा पनि आन्दोलन थालेका हुन्।
सरकारसँग पटक-पटक वार्तामा बसे पनि निष्कर्ष नआएपछि महासंघको आह्वानमा शिक्षकहरुले स्थानीय तहमा धर्ना दिन थालेको शिक्षक महासंघ, झापाका अर्थसचिव गणेश गिरीले जानकारी दिनुभयो ।
शिक्षक महासंघले सरकारसँग वार्ता पनि जारी राख्ने र आन्दोलनलाई पनि निरन्तरता दिने खणनीति लिएको छ। सो रणनीति अनुसार, आज पनि शिक्षकहरूको प्रदर्शन जारी छ भने सरकारसँग वार्ता पनि गरिरहेका छन्। सरकारले शिक्षकहरूको माग सम्बोधन गर्ने तदारुकताका केही लचिलो बनेको संकेत पाएको र शिक्षा ऐन ल्याउने विश्वस्त आधार तयार भए सम्भवतः
आन्दोलन स्थगित हुने सम्भावना बढेको शिक्षक महासंघको काठमाडौँ स्रोतले जनाएको छ।