सर्वसुलभ साकोसको आठौं साधारण सभा सम्पन्न

भद्रपुर बासीको हितमा म धरौटी बसेर पनि सहयोग गर्छु – अध्यक्ष दीपक पोखरेल

भद्रपुर २४, माघ / सर्वसुलभ बचत तथा ऋण सहकारी संस्था लिमिटेड भद्रपुर ८ झापाको आठौं वार्षिक साधारण सभा उत्कृष्ट ऋणी र बचतकर्तालाई सम्मान गर्दै सम्पन्न भएको छ । साधारण सभाले अध्यक्ष र कोषाध्यक्षद्वारा प्रस्तुत प्रतिवेदन पनि सर्वसम्मतले पारित गरेको छ।
   सहकारीका अध्यक्ष दीपक पोखरेलको अध्यक्षता र भद्रपुर नगरपालिकाका नगर प्रमुख गणेश पोखरेलको प्रमुख आतिथ्य तथा उपप्रमुख राधा कार्कीको विशिष्ट आतिथ्यमा भएको साधारण सभामा उत्कृष्ट बचतकर्ताहरु संजीव पौडेल, शिवलाल ढुङ्गाना, शिव भरोस शाह, राममाया लावती, निरज न्यौपाने र राखी राजबंशीलाई सम्मान गरिएको थियो।

त्यस्तै बन्दना शाह, जानकी शाह, प्रेमकुमार राई, तरला राजवंशी, रविशंकर भट्टराई, ममता मण्डल राजवंशी, देवीमाया कडरिया, पूर्णिमा हरिजन र मेनुका राजवंशीलाई उत्कृष्ट ऋणीका रूपमा सम्मान गरिएको थियो।
   भद्रपुर ८ स्थित नेपाल सामुदायिक विकास केन्द्रको हलमा भएको साधारण सभामा प्रमुख अतिथि नगर प्रमुख पोखरेल, विशिष्ट अतिथि उपप्रमुख कार्की, ८ नम्बर वडा अध्यक्ष गौरव सुब्बा मनोज, ७ नम्बर वडा अध्यक्ष अभिषेक ढुङ्गाना , वडा सदस्य भगवती बस्नेत, सगरमाथा सामुदायिक सिकाई केन्द्रका अध्यक्ष तोया गड्तौला, भद्रपुर नगरपालिकाका सहकारी शाखा प्रमुख नेत्र पोखरेल र झापा सामुदायिक साकोसका व्यवस्थापक आनन्द खतिवडाले शुभकामना मन्तव्य राख्नुभएको थियो ।

सहकारीका व्यवस्थापक अर्जुन दुलालले स्वागत मन्तव्य राखेको साधारण सभाको सञ्चालन सचिव मनोज दाहालले गर्नुभएको थियो भने लेखा समिति संयोजक दीप पौडेलले प्रतिवेदन प्रस्तुत गर्नुका साथै कार्यक्रमको सहजीकरण गर्नुभएको थियो।