विर्तामोड स्वास्थ्य शाखा प्रमुख लुकाइएको खोप सहित पक्राउ

BySaptahik Samachar

१५ श्रावण २०७८, शुक्रबार १९:१९ १५ श्रावण २०७८, शुक्रबार १९:१९ १५ श्रावण २०७८, शुक्रबार १९:१९

भद्रपुर १५,साउन। साप्ताहिक समाचारदाता। झापाको बिर्तामोडस्थित एक होटलमा नगरका कर्मचारीले लुकाएको सय भायल कोरोना बिरुद्धको भेरोसिल खोप सहित नगरका स्वास्थ्य प्रमुख नै फेला परेका छन् ।

शुक्रबार बिर्तामोडस्थित होटल टाइमलेस मोमेन्टमा लुकाएको खोप सहित नगरका स्वास्थ्य प्रमुख ओम खड्का फेला परेका हुन् । कोरोना विरुद्धको खोप मापदण्ड विपरीत आफू निकटलाई मात्र दिने गरेको गुनासो भइरहेका बेला लुकाएर राखिएको खोप र बिर्तामोड नगरका स्वास्थ्य प्रमुखलाई स्थानीय युवाले अपरान्ह ४ बजे फेला पारेका हुन् ।

विगत केही दिनयता स्वास्थ्य प्रमुख खड्काले सो होटलमा नजिकका ब्यक्तिहरुलाई बोलाएर खोप लगाउने गरेको जानकारीमा आएको थियो । होटेलको दराजमा लुकाएर राखिएको अवस्थामा खोप फेला परेपछि खड्काले सिलबन्दी कार्टुन फोडेर खोप अन्यन्त्रै लुकाएका थिए । तर, स्थानीय केही युवालाई शंका लागि खोजी गर्दा होटलको र्याकमा उक्त खोपको कार्टुन फेला परेको हो । खोप सहित स्वास्थ्य प्रमुख नै फेला परेपछी प्रहरी टोली समेत पुगेको थियो ।

खड्काले भने आफू होटेलमा नै क्वारेन्टाईनमा रहेकाले खोप ल्याइएको दावी गर्दै आफ्नो बचाउ गरेका छन् तर होटलको अभिलेखमा भने खड्का शुक्रबार मात्रै इन्ट्री भएको पाइएको छ । खड्कामाथि यस अघि पनि खोप लुकाएर प्रतिब्यक्ति १० हजार रुपयाँ असुलेर बिक्री गर्ने गरेको आरोप लाग्दै आएको थियो ।

बिर्तामोडमै औषधिको होलसेल पसल समेत गर्दै आएका खड्काले कोरोना संक्रमण शुरू भएयता आफ्नै फर्मका लाखौं मूल्यका सामग्री नियम विपरीत नगरपालिकालाई बिक्री गरी अनियमितता समेत गर्दै आएको स्थानीयको आरोप छ ।

झापाका प्रमुख जिल्ला अधिकारी श्रवणकुमार तिमल्सिनाले प्रहरीले खोप बरामद गरिसकेको र सो विषयमा छानविन थालिएको बताउनुभएको छन। लक्षित वर्गले कोरोना खोप नपाएको गुनासो आइरहेका बेला उक्त खोप फेला परेको हो ।

स्थानीय युवाहरुले खोपको दुरुपयोग भएको भन्दै खड्कालाई पक्राउ गर्न माग गरेका थिए ।

बिर्तामोडमा खोपको दुरुपयोग भएको गुनासो आइरहेका बेला शंकास्पद् रुपमा खोप भेटिनुले खड्ककाको कार्यशैली प्रति शंका उत्पन्न भएको प्रत्यक्षदर्शीले बताए । यसैबीच इलाका प्रहरी कार्यालय अनारमनीले खोप सहित खड्कालाई पक्राउ गरेको छ ।

घटनाको सम्बन्धमा बुझ्ने काम भइरहेको स्वास्थ्य कार्यालय झापाका फोकल पर्सन जीवन चम्लागाईले जानकारी दिनुभएको छ। घटनामा दोषी पाए कारबाही हुने बताइ रहँदा स्थानीयले भोलि नगर पालिकामा प्रदर्शन गर्ने जनाएका छन्।

Post Views: 1,666