भद्रपुर ३,कात्तिक / भद्रपुर छेउ मेची खोलामा लाग्दै आएको छैठ पर्वको मेलालाई यस बर्ष विगतभन्दा भव्य र सभ्य ढंगले सम्पन्न गर्ने तयारी भएको छ।
छैठ मनाउने बिषयमा भद्रपुरमा भएको अन्तरक्रियामा भद्रपुर नगरप्रमुख गणेश पाेखरेलले नगरको बजेट घाटामै रहेको भए पनि सवै जात जाति र समुदायको साझा पर्वको रूपमा विकास र विस्तार हुँदै गएको छैठ मेलाको व्यवस्थापनका लागि विगतको अनुभवबाट यसबर्ष बजेट बृद्धि गरेको बताउनु भयो। उहाँले भन्नुभयो-‘ पूजा स्थल निर्माणको लागि जेसिभी र अन्य स्रोत साधन उपलब्ध गराउन नगर पालिकाले कुनै कमी गर्दैन।’
मैथिल समाज झापाको आयोजनामा ५ नम्बर वडा कार्यालयको सभाहलमा शुक्रवार भएको अन्तरक्रियामा छैठ मेलाको व्यवस्थापनमा संलग्न युनिक समूह, बलभद्र युवा क्लब लगायत राजनीतिकर्मी, समाजसेवी,
बुद्धिजीवी र धर्मानुरागीहरूको उपस्थिति थियो।
समाजका झापा अध्यक्ष रमेशचन्द्र झाको अध्यक्षतामा भएको अन्तरक्रियामा सञ्चारकर्मी दीपक अधिकारी, नेकपा.एमालेका शिवकुमार राजभण्डारी,नेकपा.
माओवादीका पुकार राजवंशी र डिल्लीराम घिमिरे’हिक्मत’, वडाअध्यक्ष गौरव सुब्बा ‘मनोज’,पूर्व नगरप्रमुख भारतेन्दुकुमार मल्लिक र नगरप्रमुख पाेखरेलले आयोजकहरूबीच समन्वय र सहकार्य गरेर पूजा र मेलालाई भव्यता प्रदान गर्न सुझाव दिएका थिए।
यदुनन्दन साह रौनियार,स्वर्णिका सिंह,बलदेव साह,नारद राजवंशी समेतले धारणा राखेको अन्तरक्रियाको सहजीकरण मैथिल समाजका सचिव सुशिल कर्णले गर्नु भएको थियो।