भद्रपुरमा लायन्स र लियो क्लबको पुनर्गठन

लायन्समा उर्मिला गौतम र लियोमा सुगम गिरी निर्विरोध

भद्रपुर १७,असार / लायन्स क्लब अफ भद्रपुरको अध्यक्षमा उर्मिला गौतम चयन हुनुभएको छ। एक बर्षे कार्यकाल रहने लायन्समा जुलाई १ तारेखदेखि पुरानो समितिको पदावधि पूरा हुने हुँदा प्रस्तावित अध्यक्ष स्वतः अध्यक्ष हुने प्रावधान अनुसार गौतम सन् २०२५-२६ को लागि अध्यक्षमा चयन हुनुभएको हो ।
   सामाजिक क्रियाकलापमा सक्रिय लायन्स क्लब भद्रपुरको फस्ट भाइस प्रेसिडेन्टमा अनिता रिजाल,सेकेण्ड भाइस प्रेसिडेन्टमा पार्वती ओझा, सेक्रेटरीमा गोमा पौडेल घिमिरे र लक्ष्मी खनाल ट्रेजररमा चयन हुनुभएको छ।

वर्ष  २०२४-२५ का प्रेसिडेन्ट उत्तमराज राजवंशीको सभापतित्वमा भएको भेलामा नव निर्वाचित पदाधिकारीहरूलाई आमन्त्रित डिस्ट्रिक्ट चिफ मनोज बस्नेत,एरिया चिफ साजन थापा र क्लबका तर्फबाट चार्टर प्रेसिडेन्ट एवं पूर्वमन्त्री  ओमप्रकाश सरावगी, डिस्ट्रिक्ट चिफ शर्मिला अधिकारी र पास्ट प्रेसिडेन्ट यमबहादुर श्रेष्ठलगायतले शुभकामना मन्तव्य दिनुभएको निवर्तमान प्रेसिडेन्ट राजवंशीले जानकारी दिनु भयो। प्रेसिडेन्ट राजवंशीले आफ्नो कार्यकालको आय-व्यय सार्वजनिक गरेको सो कार्यक्रमको सञ्चालन  क्लबकी सेक्रेटरी गोमा पौडेल घिमिरेले गर्नु भएको थियो।

यसैगरी,लायन्स क्लबको भातृ संस्था लियो क्लब भद्रपुरको अध्यक्षमा सुगम गिरी निर्विरोध चयन हुनु भएको छ । सोमबार भएको निर्वाचन प्रक्रियाबाट हल्दिबारी गाउँपालिका-३ निवासी गिरीको नेतृत्वमा एक वर्षे कार्यकालका लागि क्लबको नयाँ कार्यसमिति चयन गरिएको हो । 
क्लबको उपाध्यक्षमा आराध्या प्याकुरेल, सचिवमा आदित्य दास र कोषाध्यक्षमा मनिष पौडेल चयन हुनु भएको जनाइएको छ। त्यस्तै, सदस्यहरूमा कुशल महत, सुबोध यादव, आशुतोष शर्मा, रोहित राजपूत, गौरव चौधरी, प्रतिक रौनियार शाह र सागर गौतम चयन हुनु भएको छ।