भद्रपुरमा कोसी प्रदेशस्तरीय खेलाडी छनोट प्रतियोगिता सुरू

भद्रपुर १० जेठ / मेची वहुमुखी क्याम्पस, भद्रपुरको क्रिकेट मैदान एमसीजी.मा १६ वर्ष मुनिको कोसी प्रदेश स्तरीय क्रिकेट खेलाडी छनोट प्रतियोगिता शुरु भएको छ ।
    प्रदेश अन्तरगतका ५ वटा जिल्लाहरू झापा, इलाम, मोरङ, सुनसरी र उदयपुरका खेलाडीहरू वीच राउण्ड रोविन लिगका आधारमा प्रतिष्पर्धा गराइ खेलाडी छनोट कार्य भइरहेको हो । खेलाडी छनोटका लागि ३० ओभरको खेल खेलाइएको कोसी प्रदेश क्रिकेट संघका कोषाध्यक्ष बीरू श्रेष्ठले जानकारी दिनुभयो।

प्रतियोगिताबाट छनौट भएका खेलाडीहरूबाट १६ वर्ष मुनिको कोसी प्रदेश स्तरीय टिम तयार गर्ने लक्ष्यका साथ यो प्रतियोगिता भइरहेको उहाँले बताउनु भयो। कोसी प्रदेश स्तरीय खेलाडी छनोट गर्ने महत्त्वपूर्ण यो प्रतियोगिता निर्माणाधीन यस क्रिकेट मैदानमा भएकोप्रति भद्रपुर नगरपालिकाका ८ नं. वडाअध्यक्ष तथा बीसीसी.का संरक्षक गौरव सुब्बा-मनोजले खुशी व्यक्त गर्नु भएको छ ।

कोसी प्रदेश र झापा जिल्ला क्रिकेट संघको आयोजना र भद्रपुर क्रिकेट क्लव वीसीसी.को समन्वयमा भएको खेलाडी छनोटको पहिलो खेल झापा र इलाम वीच भएको थियो । हिजो भएको पहिलो खेल इलामले जितेको थियो भने हिजै भएको दोस्रो खेलमा मोरङलाई सुनसरीले पराजित गरेको छ। छनोट प्रतियोगिता ५ दिन सम्म चल्नेछ।

  मेची क्याम्पस क्रिकेट मैदान अन्तर्राष्ट्रिय स्तरको क्रिकेट खेल खेलाउन सक्ने गरी तयारी भइरहेको छ। निर्माणाधीन यस मैदानमा यस अघि भारत जल्पाइगुरीको डुवर्स स्ट्राइकर र झापा भद्रपुरको बीसीसी.क्लब बीच मैत्रीपूर्ण अभ्यास खेल भएको थियो।

   मोरङको वैजनाथपुरमा रहेको कोसी प्रदेश अन्तरगतको क्रिकेट मैदान पछि बनेको भद्रपुरको एमसीजी. मा पहिलो पटक छनोट प्रतियोगिता भएको हो । वैजनाथपुरको क्रिकेट मैदान भन्दा पनि यो मैदान स्तरीय रहेको  क्रिकेट पारखीहरुले बताएका छन्।