झापा गोल्डकप फूटवलको तयारी पूरा/उद्घाटन खेलमा जाउलाखेल र सातदोबाटो भिड्दै

भद्रपुर १९, फागुन / मोफसलको प्रतिष्ठित झापा गोल्डकपको पाँचौं संस्करण फागुन २१ गते शनिबार देखि हुने भएको छ ।गोल्डकपका लागि सम्पूर्ण तयारी पूरा भएको झापा गोल्डकप आयोजक समितिले जनाएको छ । प्रतियोगिता, बिर्तामोडस्थित डोमालाल राजवंशी रंगशालामा हुनेछ । प्रतियोगिताको उद्घाटन खेल जाउलाखेल यूथ क्लब र सातदोबाटो युथ क्लब वीच हुनेछ।

कोरोना महामारीले दुई वर्ष रोकिएको प्रतियोगिताको पाँचौ संस्करणको तयारी सकिएको आयोजकले बिहीबार पत्रकार सम्मलेन गर्दै जानकारी दिएको हो  । 

प्रतियोगितामा भारत दार्जिलिङको एम एफसी र सिक्किमको आरपी एफसीको सहित नेपालका ए डिभिजन क्लवहरू नेपाली सेनाको त्रिभुवन आर्मी क्लब, नेपाल पुलिस क्लब, थ्री स्टार क्लब, संकटा क्लव, झापा-११ फुटबल क्लव, सशस्त्र प्रहरीको एपिएफ क्लव, जावलाखेल युथ क्लब र सातदोबाटो युथ क्लब सहित दशवटा टीम सहभागी हुने आयोजकले जनाएको छ ।  

झापा गोल्डकपको विजेताले १२ लाख ५५ हजार रूपैयाँ नगद तथा उप विजेताले ६ लाख पाँच हजार रुपैयाँ नगद सहित शील्ड र प्रमाण पत्र प्राप्त गर्ने आयोजकले जनाएको छ । प्रतियोगिताको ‘मस्ट भ्यालुएवल प्लेयर’ले एक थान मोटर साइकल पाउनेछन् भने उत्कृष्ट गोलकिपर, उत्कृष्ट डिफेन्डर, उत्कृष्ट मिडफिल्डर र उत्कृष्ट प्रशिक्षकलाई नगद २१ हजार रुपैयाँ दिइदैछ । 

प्रतियोगिताको सर्वाधिक गोलकर्ताले नगद २५ हजार पाउनेछन् । प्रत्येक खेलको म्यान अफ दि म्याचलाई नगद नाै हजार ९९९ रुपैयाँ प्रदान गरिने आयोजकले जनाएको छ । पाँचौं संस्करणको यो गोल्डकपमा नेपाल आइस बियरले मुख्य प्रायोजन गरेको हो। 

प्रतियोगिताका लागि १२ हजार दर्शक अँट्ने प्याराफिट निर्माण गरिएको छ । प्रतियोगिता सम्पन्न गर्न एक करोड ४० लाख रूपैयाँ खर्च लाग्ने अनुमान गरिएको आयोजक समितिका अध्यक्ष विनोद बस्नेतले बताउनुभयो ।

पाँचौं संस्करणको गोल्डकपको उद्घाटन पूर्वप्रधानमन्त्री तथा एमाले अध्यक्ष केपी शर्मा ओली र समापन कांग्रेस नेता कृष्ण सिटौलाले गर्ने अध्यक्ष बस्नेतले पत्रकार सम्मेलनमा बताउनुभयो ।