
भद्रपुर २,मङ्सिर / झापा भद्रपुरमा आजदेखि झापा जिल्ला स्तरीय क्रिकेट प्रतियोगिता भइरहेको छ। मेची बहुमुखी क्याम्पसको क्रिकेट मैदानमा झापाका छवटा क्रिकेट एकाडेमीहरूले प्रतिस्पर्धा गरिरहेका छन्।
भद्रपुर क्रिकेट क्लबको आयोजना र मेची क्रिकेट एकाडेमी भद्रपुरको संयोजनमा Under 16 T - 20 cricket प्रतियोगिता भइरहेको हो। प्रतियोगितामा आयोजक मेची क्रिकेट एकेडेमी, बोस्टन क्रिकेट एकाडेमी अर्जुनधारा, हि.मा.वि.क्रिकेट एकाडेमी दमक, आस्था क्रिकेट एकेडेमी दमक, मिलन क्रिकेट क्लब काकरभिटा र युनाइटेड क्रिकेट एकेडेमी बिर्तामोड प्रतिस्पर्धा गरिरहेका छन्।
लिग कम नकआउटका आधारमा खेलाइने प्रतियोगितामा खेल भावनाको विकास गर्दै सानै उमेरदेखि अनुशासन, एकता र आपसी सद्भावका साथै सीप वृद्धि र विकास गर्न प्रतियोगिता आयोजना गरिएको भद्रपुर क्रिकेट क्लबका अध्यक्ष एबम् ८ नम्बर वडा अध्यक्ष गौरव सुब्बा मनोजले जानकारी दिनुभयो।
कोशी प्रदेशका पूर्व सांसद बसन्त बानियाले प्रतियोगिताको उद्घाटन गर्दै खेल भावनाबाट प्रेरित भएर खेल्न युवा खेलाडीहरूलाई उत्प्रेरित गर्नुभएको थियो। T -20 क्रिकेट खेलका संयोजक अमित शर्माको अध्यक्षतामा भएको उद्घाटन खेल आयोजक मेची क्रिकेट एकाडेमी र बोस्टन क्रिकेट एकेडेमी अर्जुनधारा बीच भएको थियो।
