भद्रपुर झापा गोल्डकपका दर्शकलाई पुरस्कारै पुरस्कार

फाइनल हेर्ने दर्शकलाई टिभिएस मोटरसाइकल, अरूलाई एलइडी टिभी

भद्रपुर १७ , माघ / दोस्रो संस्करणको सौर्य एअर ओम साई पाथिभरा हस्पिटल भद्रपुर झापा गोल्डकपका दर्शकले टिभिएस मोटरसाइकल पाउने भएका छन् ।
टिकट लिएर प्रतियोगिता हेर्न आएका दर्शकमध्ये एकजनालाई जगदम्बा मोटर्सले टिभिएस मोटरसाइकल उपलब्ध गराएको गोल्डकपका अध्यक्ष दिपेश ढकालले बताउनु भयो ।

  यही फागुन ७ गतेदेखि १६ गतेसम्म आयोजना हुने गम्भीर राई स्मृति संस्करणको फाइनल खेलका एकजना दर्शकले टिकटका आधारमा लक्की ड्रमार्फत मोटरसाइकल पाउने उहाँले जानकारी दिनुभयो ।
त्यस्तै, प्रिक्वार्टर, क्वार्टर र सेमिफाइनलका खेल हेर्न टिकट लिएर आएका दर्शकलाई बिर्तामोडको महेन्द्ररत्न स्टोर्सले हिमस्टार एलइडी टिभी प्रदान गर्नेछ ।
प्रतियोगितामा विभागीयसहित नेपालका ६ वटा ए डिभिजन क्लब, भूटान र बंगलादेशका एक/एक टिम तथा झापा ११ र आयोजक भद्रपुर ब्लेजर्स टीमको सहभागिता रहने महासचिव जीवनकुमार श्रेष्ठले बताउनु भयो ।

२०७९ मा पहिलो संस्करणमा निकै ठूलो चर्चा र प्रशंसा बटुलेको भद्रपुर झापा गोल्डकपले दोस्रो संस्करण अझ भव्य र थप परिस्कृत हुने गरी तयारी गरिरहेको अध्यक्ष ढकालले बताउनुहुन्छ।
झापाको सरकारी स्वामित्वको सुविधायुक्त मेची रंगशालामा आयोजना हुने प्रतियोगिताको  पहिलो संस्करणको उपाधि त्रिभुवन आर्मी एफसीले जितेको थियो ।