भद्रपुरमा हुने क्रिकेट प्रतियोगिताको धुमधाम तयारी

कोशी पाथीभरा इन्डो नेपाल क्रिकेट च्याम्पियनसिप

नेपाल र भारतका आठवटा टिमको सहभागिता

भद्रपुर १३,माघ / भद्रपुरमा हुने कोशी पाथीभरा इन्डो–नेपाल टी २० क्रिकेट च्याम्पियनसिपको मिति नजिकिदैं गर्दा त्यसको तयारी धुमधामसँग भइरहेको छ ।
कोशी पर्यटन वर्षको अवसरमा प्रदेश सरकारको आर्थिक सहयोगमा पर्यटन क्षेत्रको विकास र प्रवर्द्धन गर्ने उद्धेश्यले कोशी पाथीभरा इन्डो–नेपाल टी २० क्रिकेट च्याम्पियनसिप गर्न लागिएको हो । भद्रपुर क्रिकेट क्लबको आयोजनामा मेची क्याम्पसमा रहेको क्रिकेट मैदानमा हुने प्रतियोगिता लिग ढाँचामा हुनेछ।
     माघ २१ गतेदेखि २९ गतेसम्म सञ्चालन हुने प्रतियोगितामा नेपालका चार वटा र भारतका चार वटा गरी आठ वटा क्रिकेट टिमको सहभागिता रहने छ । प्रतियोगिता सम्पन्न गर्न विभिन्न उपसमितिहरू गठन गरी तत् तत् समितिलाई जिम्मेवारी दिएर काम अगाडि बढाइएको आयोजकले जनाएका छन्।

मूल आयोजक समितिका संयोजक तथा भद्रपुर ८ का वडाध्यक्ष गौरव सुब्बा मनोजका अनुसार, प्रतियोगितामा नेपालका तर्फबाट आयोजक भद्रपुर क्रिकेट क्लब, गण्डकी हिरोज पोखरा , ग्रेट हिमालयन क्रिकेट एकेडेमी काठमाडौँ र फ्रेन्ड्स युथ क्लब डडेलधुरा रहेका छन् ।
   त्यस्तै भारतको तर्फबाट राइनोल्यान्ड क्रिकेट एकेडेमी आसाम गुवाहाटी, ग्लोबल स्टार क्रिकेट क्लब लखनऊ, क्रिकेट कोचिङ उपाध्याय एकेडेमी न्यु दिल्ली र स्नो लायन टिम अफ सिक्किम रहेका छन् । नेपालका क्लबहरूमा एनपीएल खेलिसकेका खेलाडीहरू र भारतका क्लबहरूमा रञ्जित ट्रफी खेलिरहेका खेलाडीहरूको सहभागिता रहने समेत संयोजक सुब्बाले जानकारी दिनु भएको छ।
    एक करोड २२ लाख रूपैयाँ खर्च अनुमान गरिएको प्रतियोगिताको विजेताले नगद पाँच लाख, मेडल र ट्रफी पाउनेछ भने उपविजेताले नगद तीन लाख रुपैयाँ, मेडल र ट्रफी प्राप्त गर्नेछ । त्यस्तै, प्रत्येक खेलको प्लेयर अफ द म्याचले नगद ११ हजार रुपैयाँ र ट्रफी पाउने छन् ।  प्रतियोगिताको उत्कृष्ट बलर र ब्याटरले नगद २५ हजार रुपैयाँ र ट्रफी पाउने छन् ।

उदीयमान खेलाडीलाई नगद ११ हजार रुपैयाँ र ट्रफी पाउँदा प्रतियोगिताको सर्वोत्कृष्ट खेलाडीले नगद ५१ हजार रुपैयाँ र ट्रफी पाउने क्लबका महासचिव वसन्त पोखरेलले जानकारी दिनुभयो ।
प्रतियोगितामा आठवटा टिमलाई दुई समूहमा विभाजन गरेर लिग ढाँचामा प्रतिस्पर्धा गराइनेछ । कोशी प्रदेश सरकार,भद्रपुर नगरपालिका र स्थानीय समाजसेवीको सहयोगमा करिब ६० लाख रुपैयाँ खर्च गरेर पिच निर्माणको काम अन्तिम चरणमा पुगेको छ ।